Tant suy marritz que no·m puesc alegrar
per re qu'auja ni veja sotz le tro,
per chant d'auzels ni per lays ni per so,
................. ni per temps belh e clar ;
ans tota gens privada·m par estranha
e totz mos gaugz maiers mi par corrotz,
quar fallitz m'es lo melher reys de totz
per pretz complitz de tota bona manha,
per qu'en ira·m son mudat mey plazer ;
e pus qu'em vol aissi·l mortz dechazer,
es ben razos que joya me sofranha.

Joya·m sofranh e dols mi vey sobrar,
e no trop re que·m fassa be ni pro,
quan mi sove del bon rey d'Arago ;
ladoncx mi pren fortmen a sospirar
e prezi·l mon tot atrestant quom fanha,
quar ylh era francx, humils, de paucx motz
e de grans faitz, si que sobre·ls reys totz
que hom aya ja trobatz en Espanha,
era plus altz per valor conquerer ;
e pus que·l reys tant sabia valer,
razos requer que totz le mons s'en planha.

Totz le mons deu planher e doloyrar
la mort del rey per drech e per razo,
quar anc princeps negus melher no fo
del nostre temps de sa ni de la mar,
ni tant aya fach sobre la gent canha,
ni tant aya eyssausada la crotz
on Jhesus Cristz fon pauzatz per nos totz.
Ay ! Aragos, Cataluenha e Serdanha
e Lerida, venetz ab mi doler,
quar ben devetz aitant de dol aver
cum per Artus agron silh de Bretanha.

Ges Bretanha no·s pot enquers calhar
que no·s planha per un rey que ac bo ;
ayssi planh yeu son cors e sa faysso
e·l avinent aculhir e·l parlar
del noble rey, si que pels huelhs si banha
tota ma fatz aissi com si era dotz,
quar ylh era vaysselhs complitz de totz
bos ayps. E reys qui tans de bes gazanha
en sa vida, deu portar e tener
apres sa mort corona, per dever,
ab si una et autra que·ns remanha.

La corona que·ns rema, figurar
se deu ayssi, qui drechamen la espo :
per lo cercle qui torna de viro
se deu bona fama significar,
pels traversiers valors ab sa companha,
pels quatre claus qui la fermon de sotz,
quatre vertutz, per que resplan reys totz,
so es merces cuy drechur'acompanha,
e largueza ab natural saber ;
l'altra so es karitatz ab esper,
e fes, que res no destruy ni gavanha.

Mortz, pus no·t puesc destuyr'e gavanhar
ab cruzels faitz, sevals ab brau sermo
te vuelh maldir, quar m'as le cor fello
fait per totz temps, quar say venguist trencar
l'arbre don ey gran raso que·m complanha ;
e te, vida, no pretz mays una notz,
quar t'as layssat tolre·l melhor de totz
qu'om sabia, per qu'est d'avol barganha,
quar la on tu mais deurias poder,
layssas tostemps ton alt nom apremer
a la vil mort, cuy Jhesus Cristz contranha.

En l'an mile, qui ben los sap comtar,
que Jhesus Cristz pres encarnatio,
dos cens e mays setanta seys que so,
le rey Jacmes el sete kalendar
d'agost feni ; donc preguem que ss'afranha
Jhesus a luy e·l gart del prevon potz
on Dieus enclau les angels malvatz totz,
e·lh do los gauchz en que l'arma·s refranha,
e·l corone e·l fassa lay sezer
en selh regne on non a desplazer,
quar aitals locx crey que de luy se tanha.

A tota gens don eyssampl'en paucx motz :
le reys Jacmes es apellatz per totz,
e Dieus a·l mes ab Sant Jacm'en companha,
quar l'endema de Sanct Jacme per ver
le reys Jacmes feni, qu'a dreyt dever
de dos Jacmes dobla festa·ns remanha.

Matieus a fait per dol e per corrotz
son planh del rey qu'amava mays que totz
les altres reys, e que totz hom se·n planha
e que·l sieus noms puesqua el mon remaner,
e que·n puesca dels filhs del rey aver
e dels amicx plazers en que·s refranha.