Uns amics et un' amia,

Sordel

A lei puesc ma mort demandar! Ailas, e que·m fau miey huelh, Aitant ses plus viu hom quan viu jauzens, Anc al temps d'Artus ni d'ara Ar hai proat q'el mon non ha dolor Atretan dei ben chantar finamen Bel m'es ab motz leugiers a far Ben deu esser bagordada Bertrans, lo joy de dompnas e d'amia Del cavaler me plai, qe per amor Digatz mi s'es vers zo c'om brui, Doas domnas aman dos cavalliers, Dompna valen, saluz et amistaz, Dompna, meillz q'om pot pensar Donpna, tot eissamenz En Sordell, qe vos es semblan Entre dolsor ez amar sui fermatz Er encontra·l temps de mai Gran esfortz fai qui ama per amor Lai a·n Peire Guillem man ses bistenza, Lai al comte mon segnor voill pregar Lo reproviers vai averan, so·m par, Mant home·m fan meravilhar, Meraveill me com negus honratz bars, No·m meraveill si·l marit son gilos Non pueis mudar, qan luecs es, Per re no·m puesc d'amor cuydar Planher vuelh en Blacatz en aquest leugier so, Puois no·m tenc per pajat d'amor Puois trobat ai qi conois et enten Qan an plus creis, dompna, ·l desiriers, Qan q'ieu chantes d'amor ni d'alegrier Qui be·is membra del segle qu'es passatz Senh'en Sordelh, mandamen Si co·l malaus qe no se sap gardar Si com estau taing qu'esteia Si tot m'asaill de sirventes Figiera Sol que m'afi ab armas tos temps del sirventes Tant m'abellis lo terminis novels Tos temps serai ves amor Toz hom me van disen en esta maladia Uns amics et un' amia,

Uns amics et un'amia,
Sordels, an si un voler
Q'a lor semblan non poiria
L'uns ses l'autre joi aver!
E si l'amiga moris
Aissi qe l'amics o vis,
Qui no la pot oblidar,
Qe·ill seria meillz a far:
Apres lei viure o morir
Digatz de so vostre albir.

Guillems, tant am ses bausia
Lei qe·m ten en son poder,
Que senes lei non volria
Viure, per negun aver!
Per qe de l'amic m'es vis
Qe, si morz de lui partis
Lei, on a tot son pensar,
Qe meillz li seria anar
Lai, ab lei, qe sai languir
Totz temps, e dolor soffrir.

Sordels, ja pro no·i auria
L'amiga, so sai en ver,
Si l'amics per lei moria,
E faria·s fol tener,
Per qe·l viures li es plus fis!
E n'Andreus, si tot s'aucis,
No·i gazaingnet ren, so·m par!
E vos sabez mal triar!
C'om non deu aso seguir
Don pot ses ben mal venir.

Guillems de la Tor, follia
Mantenez, al mieu parer:
Com podez dir qe deuria
Vida meillz qe morz valer
A cellui qe no·s jauzis
De joi, e toz temps languis
Q'anz q'el o degues durar,
El mezeis, ses tot doptar,
Se deuria enanz ausir,
S'esters non pogues fenir.

En Sordels, eu trobaria
A ma rason mantener
Plus que vos de compaingnia!
So devez vos ben saber,
Q'en mort non a joc ni ris
E vida atrai et aisis
Mainz bens, qi·ls sab percazar!
Per qe deu laissar estar
So don plus no·is pot jauzir
L'amics, e·s deu esbaudir.

Ja tant no s'esbaudiria,
Guillems, qe, qant del plazer
C'aver sol li menbraria,
Q'el se pogues ja tener
Qe dols e plors no·l marris!
E, s'il ab sidonz fenis,
Poirian l'a dreit lauzar
Li amador de ben amar,
E serian li cossir
Fenit, e·il plor e·il sospir.

Sordels, car verais prez fis
Es a n'Azalais aclis
De Vizalaina, me par
Qe deia aquest plait juiar!
E so q'ella en volra dir
Deu ben a totz abellir.

Car toz hom pros s'abellis
De na Cuniza e grazis,
Guillems, son valen prez car,
Tanh c'ab n'Alais deia far
Lo jujamen e complir,
E tuit lo devem grazir.

Source: http://www.cam.org/~malcova/troubadours/