Ab gran joi mou maintas vetz e comenssa
So don hom puois a dolor e cossire.
Per mi·us o dic, que folla conoissenssa
Aic d'un semblan ab que·m trahinet gen
Silh on anc plus m'entendiei finamen!
C'adoncs fui rics qu'esser cugei amatz!
Aras s'es fort totz mos affars camjatz.

Amors a pauc de vera mantenensa
--Non o puosc mais celar ni escondire,--
Que·il fals aman qui·s fant fin en parvensa
La decazon per lor galiamen.
E las dompnas si·s n'ant colp'eissamen,
C'a penas er negus drutz, so sapchatz,
Que non engan e non si'enganatz.

Ma dompna·m fai morir per tal faillensa
Que l'estai mal, s'ieu lo ausava dire.
Ill n'a·l pechat, et ieu la penedenssa!
E ges no·il trob ochaison de nien.
Pesa·m car ai tant bon razonamen!
Trop es mos dreitz conogutz e proatz!
Mais volgra fos messonga la vertatz.

Ai tant greu m'er, s'aissi pert m'entendensa
Del bon esper on suoill mon cor assire!
Pero trop n'ai orgoillosa temensa,
C'ab mal talan l'encolp e la repren!
E si·m sai eu d'amor lo meillor sen!
C'om ja de ren non se fezes iratz,
Mas c'om saubes son mal soffrir en patz.

Contra midonz non posc aver tenensa.
Cant ieu l'esgart e vas mi la vei rire,
Tota m'osta l'ir'e la malvolenza
La so'amors que·m destregn dousamen.
E s'anc mi fez mal ni airamen,
Can pais mos oils glotos sa grantz beutatz,
Cujatz c'adonc li voilla mal -- no fatz.

Follatges es qui son affar bistensa:
No·m tenrai mais d'aisso q'ieu plus desire.
Mais vuoill c'a tort m'amiga doussa·m vensa
Que per mon dreig plor ni plaigna soven.
Merce·il qerrai d'eis lo sieu faillimen,
Tot enaissi cum er sa voluntatz,
C'ab lieis no·m pot nuills plaitz esser malvatz.

El vers vos man, dompna, c'a vos mi ren,
Que res aitan no m'agrada ni·m platz!
E vailla mi ma fina voluntatz

En Vianes anera plus soven,
Mas per midonz remain sai Alvergnatz,
Prop del Dalfin, car sos afars mi platz.