Un sonet fatz malvatz e bo

Guiraut de Bornelh

A be chantar A be chantar A l'onor Deu torn en mo chan, A penas sai comensar Ab semblan me fai dechazer Ailas, com mor·quez as, amis - Aital chansoneta plana Alegrar me volgr' en chantan Amars, onrars e charteners, Amors, Ans que venha·l nous fruchs tendres Aquest terminis clars e gens, Ar auziretz Be conve, pos ja baissa·l ram Be deu en bona cort dir Be deu om chastian dire Be for'oimais drechs el tems gen, Be me plairia, senh'en reis, Be m'era beus chantars Be vei e conosc e sai, Ben es drechs, pos en aital port Can brancha·l brondels e rama Can creis la frescha folh'e·l rams Can la brun'aura s'eslucha Can lo glatz e·l frechs e la neus Car non ai Cardalhac, per un sirventes Chans en brolh ni flors en verjan De bels digz menutz frays De chantar De chantar ab deport En un chantar, Era, can vei reverdezitz Era, si·m fos en grat tengut, Era.m platz, Giraut de Bornelh, Er'ai gran joi que.m remembra l'amor Gen m'aten Ges aissi del tot no·m lais Ges de sobrevoler no·m tolh Ja·m vai revenen Jois e chans Jois sia comensamens La flors del verjan L'altrer, lo primer jorn d'aost, Leu chansonet'e vil Lo dolz chans d'un auzel, Los aplechs, M'amia·m men'estra lei. Mas, com m'ave, Deus m'aiut, Mot era dous e plazens No posc sofrir c'a la dolor No.m platz chans de rossinhol, No·s pot sofrir ma lenga qu'ilh no dia Nulha res a chantar no·m falh, Obs m'agra, si m'o consentis Per solatz revelhar, Planc e sospir Qui chantar sol Razon e loc Reis glorios, verais lums e clartatz, S'anc jorn agui joi ni solatz, S'era no poia mos chans, S'es chantars ben entendutz Ses valer de pascor Si ja d'Amor Si per mo Sobre-Totz no fos, Si sotils sens Si·l cor no·m ministr'a drech Si·m plagues tan chans Si·m sentis fizels amics, Si·us quer conselh, bel'ami'Alamanda, Sol c'Amors me plevis Solatz, jois e chantar Tals gen prezich'e sermona Tot gen m'estav'e suau et en patz Tot suavet e de pas Totztems me sol plus jois plazer Un sonet fatz malvatz e bo

Can creis la frescha folh'e·l rams
E l'ombra s'espeiss'els defes,
M'agrada l'aur'e·l tems e·l mes
E·l gaps e·l ris e·l jois e·l chans
E·l dolz mazans,
Que creis, can s'azina·l matis,
Si no·m gandis
Mos-Senher convinens, e mans
Fora m'enans
Qu'eu fes un vers que fos per cels chantatz
Cui pretz e jois e cortezia platz.

E no cuder'entre nos ams
Mals ni meschaps ni tortz chaubes!
Mas s'eu te cre e tu no·m cres,
Com te posc esser fis amans
Meus es lo dans
Qu'eu fora frachs e francs e fis,
Si·m consentis
Que l'esperans'e·l bels semblans
Me fos durans!
Mas a greu er vera fin'amistatz,
Pos qu'i sofranh tota l'una meitatz.

E cudatz c'aisso sia clams
Ni qu'eu m'en rancur no fatz ges
Tota ma rancur'es: merces
Si be·s passa·l dichs los garans,
No·n sui clamans,
Mas be volri'ela chauzis
Que no·n falhis!
Tan es adrech'e benestans
Que·l maier pans
Chaira del pretz, si no·l soste vertatz,
Et er a greu fis cor enves dos latz.

Ges leis non ateis lo liams
En que cudei c'ams nos prezes.
De me conois be que sui pres,
C'ades par fis amics trians,
Qu'eu cuder'ans
Que s'aspra chaptenensa vis,
C'us cals que ris
M'aleuges mos maiors afans
E·ls plus pezans
Mas desqu'eu vi que·l cor l'era chamjatz,
Chamjera·l meu, s'aissi no fos fermatz.

E pos del mal no·m part la fams
E conosc cals seria·l bes,
Si no m'en part, falh·tu no ges
E com·ja semblari'engans
Aitals balans
C'om ben ames e no sofris
E tu ja dis
Que·l mals aiuda·l be cen tans
Ja no soans
So que plus vols ni t'en fenhas iratz!
Que guerra tol soven so c'adui patz.

A, com fo·n petitz lo reclams
Qui tan prim non o conogues,
Can li plac c'ab se·m retengues
E·m soferc qu'eu li fos comans
E·m det ses gans
Sas mas, per que melhs m'enriquis,
Tro pois m'aucis,
Can me fo veiaire·l demans,
C'us dels Bertrans
Non es tan ferms ni tan ben ensenhatz
C'ad aital pas no fos totz issaratz.

E pois a que diras que m'ams,
Si, can m'auras gran be promes,
Me falhs e·m ditz qu'eu sui mespres
E que no·m doptas ni no·m blans
No m'o desmans,
Qu'eu no volri'om pros plevis
So que mentis!
No·s tanh mas als trafas truans
Fals e chamjans
Que s'eu vos dic d'aisso, volh que·m crezatz:
Per no-poder rema, si non o fatz

E no volh esser corelhans,
Per qu'eu bobans
Pro vetz d'aisso don altre for'iratz!
Qu'en Sobre-Totz s'en es a me clamatz.

D'un convinen que m'es tan deslonhatz
Qu'eu neis m'en for'e mos Folha laissatz.

Source: http://www.cam.org/~malcova/troubadours/