Si anc nuills hom, per aver fin coratge
Ni per amar leialmen ses falsura,
Ni per sofrir franchamen son dampnatge,
Ac de sidonz nuill'onrad'aventura,
Ben degr'eu aver
Alcun covinen plazer,
Qe·l ben e·l mal, cal q'ieu n'aia,
Sai sofrir, et ai saber
De far tot qant midons plaia,
Si qe·l cor no·n puosc mover.

De fin'amor sai segre·l dreich viatge,
Si que tant am mi donz outra mesura
Qe far en pot tot qant l'es d'agradatge!
Qu'eu no·ill deman, tan tem dir forfaitura,
Baisar ni jazer --
Pero si sai tant valer
Ad ops d'amar, qui q'en braia,
C'onrat jorn e plazen ser
Et tot so c'a drut s'eschaia
Aus desirar e voler.

Si tot lo vuoill, ieu non ai autre gatge,
Don ni autrei ni paraula segura...
Mas ill es tant franch'e de bel estatge
Que la valors e·l pretz, c'a lieis s'atura
Fai a totz parer
C'Amors i aia poder,
Qe lai on es valors gaia
Deuria merces caber --
Vec vos tot so qe·m n'apaia
E·m tol, qe no·m desesper.

Mas e que·m val qu'ieu non ai vassalatge
Ni ardimen don l'aus dir ma rancura!
Qe tan dopte s'onor e son paratge,
Son gai joven e sa bella faitura,
Qu'aisso·m fai temer
Qu'a leis non deigna caler
De mal ni d'afan qu'ieu traia!
E si·m volgues retener
No volgr'esser reis de Maia,
Tan cum ab lieis remaner

Auzit ai dir, de savi ses follatge,
Q'om ora mal celui don non a cura,
E ditz que·l don Dieus jove seignoratge --
Aqest oratz sia tortz o drechura,
Ai d'amor per ver,
E, si l'ai, no·m pot doler!
Que, de pro dompna veraia,
Val mais c'om ric dan esper
Qu'aia don d'avol savaia
Qu'om non deu en grat tener.

Q'ieu·n sai una q'es de tant franc usatge
C'anc non gardet honor sotz sa centura --
Sieus es lo tortz s'ieu en dic vilanatge --
Qe, senes geing e senes cobertura,
Fai a totz vezer
Cum poing en se deschazer --
E dompna q'ab tans s'essaia
Non cuich ja qe m'alezer,
Que ja de lieis ben retraia,
Ni·m vuoill qe·m deia eschazer.

Na Maria, dompna gaia,
Vos non etz de tal saber,
Car non faitz ren que desplaia,
Anz plai tot e deu plazer.