Un vers voill comenzar el son de meser Gui.
Pois Guis m'a dit mal, eu lo dirai autressi,
Q'en son alberc raubet Raimon de Saint Marti!
E'N Raimon de Neiron i raubet autressi:
De lai de Cataloingna lo fes venir assi.
Ar aujatz de can loing trais aig'a son moli:
....................
Pois pres mi donz N'Ines, e vejatz com l'aussi:
Perdre laisset la tera c'anc hom meillor no vi,
Qe no fes demandar de ser ni de mati.
En Agos venqet lo ab gran mescab, zo di:
Lo veill deserritat l'apellon sei veisi,
E, si oms lo loingna, no dari'un roci.
Anc, pois laisset la Crotz, no·l tinc per pelegri· oi.

Avetz auzit q'En Ricas Novas ditz de mi.
Mal se rasonet el, et es dreich autressi
Q'eu lo diga de lui, pois el l'a dit de mi.
Be sai qe no er reis merce de Joanni,
Qe nos enviet sai vergoignos e cap cli.
E, per l'anta qe·l fes, el raubet lo cami
D'un borges qe·l guiava, et al presen son qui.
E pois s'ai auzi dir c'al viscomte plevi
Qe d'el ja no·s partra tro al jorn de la fi!
Pois lai anet a penre, don lo viscoms merci:
E, si ben es rics hom, el en aizo failli,
Et es faillitz en alre, zo·m dizon sei veissi.
Mas, si tot me sai paubre, una re vos affi:
C'anc, per gazaignar terra, no aucis mon cosi· oi.