Ar vei bru, escur, trebol cel
Don per l'air vent'e giscl'e plou,
E chai neus e gels e gibres,
E·l sol qu'era cautz, ferms e durs
Es sa calors teun'e flaca,
E fuelh e flors chai jos dels rams
Si que en plais ni en blaca
Non aug chans, ni critz mas dins murs;
Per qu'ieu chantarai alques grams.

Mas aura ni plueja ni gel
No·m tengran plus que·l gen temps nou
S'auzes desplejar mos libres
De fag d'amor ab digz escurs;
So don plus Temers m'es jaca
Qu'Ira·m fes dir midons e clams;
Que mais d'amor don m'estaca
No chantari'ab nulhs agurs
Tro plais vengues entre nos ams.

Mas d'aisso que·m sap pro a fel
Puesc chantar, don grans mals mi mou:
Dels fals, plus ponhens que gibres,
Envejos, parliers, mals tafurs,
Q'us quex ponha, et ataca
Com als fis drutz sia Joys lams;
Et on qu'aia porc ni vaca
Ilh n'auran pro, e·l vis er purs;
E pueys fan grans critz, rotz e brams.

Qu'ieu sai un trachor mal fizel
Que par qu'aia sen meins q'un bou
Et es ben dels regoibres
Quar ponha cum traia segurs
Son senhor que·l cor l'ensaca;
E s'er'entoisseguatz els cams
No·s cug que·l quezes tiriaca,
Ans li querri'ab totz aturs
Com lo pendes ab fortz liams.

Quar anc Caim, qu'acis Abel,
No saup de tracion un ou
Contra lieis, -- mas ieu par ibres,
Quar li dic so don sui madurs,
Si·m carga lo col e·m maca;
Mas tan me dol la pen'e la fams
Quan me soven de la raca
Non aus parlar neis dels perjurs
De lieis, quan me membra·l satams.

E si·m saubra·l chantars a mel
Ab mon vers qu'ai fait pres d'an nou,
Quan guarengals e gingibres
An lur sazo ab mains gasurs,
E Mos Estreups qu'es part Jaca
No faria tal per dos dams,
En aquesta rima braca,
Ab qu'en fos sieus Acres e Surs,
E de sai Peitaus e Roams.

Qu'er si be·s fer de l'esclaca
S'il no men ab sos diz escurs
Si sui cel que i serai lams.

Mos vers, qu'enaici s'estaca,
Volgra que'm fos portaz segurs
A Demoniad'e que·l fos grams.