A mon vers dirai chanso
ab leus motz et ab leu so
et en rima vil e plana,
puois aissi son encolpatz
qan fatz avols motz als fatz;
e dirai so qe·en cossir,
qui qe·m n'am mais o·m n'azir.

D'amar tornon en tenso
cill on anc amors non fo
plus q'en mi obra vilana,
e ditz qecs: «ie·n teing los datz
e·n sai mais que nuills hom natz»;
per qe·m platz a devezir
d'aco que a moutz n'aug dir.

E si torn en ocaizo
cel dig qe·m fai plus felo,
no m'o tengatz ad ufana:
car per trops es autreiatz,
q'al mais aug dir, e no·m platz,
que domna se vol aucir
que ric home deigna auzir.

Qecs a dreig qe s'arazo,
mas vers venz qui be·l despo
et ieu dic paraula sana:
que mieills deu esser amatz
rics hom francs et enseignatz,
qu'il pot pro e bel chausir
per dompna q'aus precs soffrir.

Mas dompna c'ama a lairo
ab semblan de tracio,
non deu ges esser autana:
mas en bas luoc s'asolatz,
si que sia [a]coindatz
e qe·i puosca endevenir
la nuoich e·l jorn ses dezir.

Anc dompna, qui q'en sermo,
per nuill ric home non fo
ni tornet de pretz sotana;
et ieu sai et es vertatz
que pros cavalliers privatz
vist a[i] tals dompnas delir,
c'om s'en degra sepeillir

E dirai en mais? ieu no,
ara en aqesta sazo!
mas si negus hom si vana
c'ab me se·n contrast'iratz,
adoncs n'auziretz viatz
tals motz per me ses mentir
c'om non poiria cobrir.

Dieus retenc lo cel e·l tro
a sos ops ses compaigno,
et es paraula certana
c'a midonz laisset en patz
c'aseignoriu vas totz latz,
qe·l mons totz li deu servir
e sos volers obezir.

Ja de mort ni de preiso
no·m gart Dieus ni gaug no·m do,
si midonz qe·m te ses cana
no val pro mais c'autra assatz,
segon qu'eu cre, e sapchatz
que totz hom que la remir
s'enten en lieis al partir.

Dompna, ieu vos dei grazir
so q'ieu sai ben far e dir.

E si·m datz ab lonc desir
lo ben qe·m degratz offrir.