Lo XXIIII vers d'en Gr. Riquier, l'an MCCLXXXVIII, en novembre

Vertatz es atras tirada
e messonja enantida,
e lialtatz encaussada
e falsetatz aculhida,
qu'om ten per dreg son voler
ez obra de son poder,
don tortz es tan poderos,
que dreitz es a non chaler
vengutz, que no·y val sermos.

Sancta fes es sermonada
mot, e pauc l'obra seguida,
tant es plazens e privada
selha de mundana vida,
qu'om per complir son plazer,
desconoys dreg e dever,
e d'aver es tant curos
hom, e pro non pot aver,
que no sap que s'es razos.

E crey qu'a Dieu non agrada
quar amors no·ns es aizida,
ni merces non es trobada;
per que patz nos es falhida
qu'om no la vol enquerer,
don deu lo mons dechazer;
quar Dieus totz savis, totz bos
no vol en loc remaner,
on baratz renh e tensos.

Mas si patz fos essercada
tant quon es guerr'afortida,
erguelhs non agra cassada
merce, qu'al mon fort oblida,
per qu'amors no·y pot caber,
ni sens no·y pot res valer,
qu'erguelhs e baratz ginhos
tolhon auzir e vezer
ad home totas sazos.

Jhesus Cristz nos a mostrada
via, qu'es del ver gaug guida,
mas tant es pauc ademprada,
per que petit es polida
quar mot es greus per tener,
qu'om manjar be ni jazer
no· y pot, ans viu sofrachos
del mon que deu fort temer
quar tot l'es contrarïos.

Lo mons no dona lezer
de be, e fa mal plazer,
e qui pus l'es amoros,
mens a de ben far poder:
tant es le mals saboros!

Sanctz paires, Dieus glorïos,
senher, datz nos tal saber
que·l mon azirem per vos.