Lo XIIII [= 13°]vers d'en Gr. Riquier, l'an MCCLXXXIII, en novembre

Per proar si pro privatz
m'es mos sabers mentaugutz,
vuelh valen vers far viatz
obratz d'obra, don ja brutz
no crey que·n cresca cabals,
don dans m'a dat desconort,
tant vey trobar trist a tort.

Trop tart er trobars trobatz,
que·l mons de mundar mogutz,
gaire gays guide, don gratz
lans son don lauzan a lutz;
quar faitz vol qu'om fassa fals
e·ls bos e·ls bes bayssa fort,
tant que·l mielhs e·l mays son mort.

Mal m'es quar mals es montatz
e bes bayssan abatutz,
volven ver en vanitatz,
escassan bes quays cazutz;
qu'enguans d'enguanar engals
a sols sotzmes a sa sort
lo mon lag, luenh de bon port.

Larcs es le laitz, eslayssatz,
non braus, abrivatz, batutz
camis croys, on corr cochatz
totz lo mons tortz, entendutz
en far vils faitz yfernals,
don l'aduch en desacort
sos senhers ses san conort.

Si sens de saber sazatz
agues guaire guitz avutz,
Dieus, a dar dos adonatz,
bos, benestans, bels saubutz,
nos pascr'ab patz, passatz sals;
mas notz non lo nos, que·ns mort
e·ns ro ros, ras del bon ort.

Reys ricx regnans los reyals,
faitz nos far fach de deport
final, qu'a fin fis nos port.

Filhs e fraires an fach tort
per pro: ses pro planc mot fort.

Per pretz planc mon Belh Deport.