Lo XVII [= 16°] vers d'en Gr. Riquier, fach en l'an MCCLXXXIIII, el mes de martz

Lo mons par enchantatz,
quar voutz ez enchantatz
es, e pres de chazer,
que tant vey dechazer
los faitz adordenatz
e·ls desazordenatz
enantir ses dever,
que tortz es amparatz
e dreitz desamparatz,
qu'om no· y cura dever.

Per que n'a desplazer
Dieus, que volc per plazer
cristïas enantir,
qu'er vol desenantir;
e par quar per aver,
don devem dol aver,
nos propcham de perir,
tant q'us non a poder
que razos l'apoder
quan degram resperir.

Qu'om degra faitz chauzir
ses son par deschauzir,
on dreitz ren no perdes,
e d'als que s'esperdes
don tortz pogues issir;
mas dels bes desissir
non es hom leu cofes
ni las, quant que s'azir,
ni temors de sazir
no·l fa leu ver cofes.

Qui dels mals se gardes
e·ls bes ben esgardes
grans, que Dieus nos a faitz,
don nos troba desfaitz,
clergues, nobles de pes
de ginols e de pes,
se·n fora quecx retraitz,
per que quant nos clames,
Dieus de nos no·s clames
ab terribles retraitz.

E quascus fora saitz
de Dieu, per bos assaitz,
a luy deutes pagatz
don elh fora pagatz;
e quar le bes es traitz
de nos, Dieus s'es estraitz
d'amar, no·s prenden patz,
qu'avem sos comans fraitz,
e quar nos troba fraitz
ans, relinquitz ses patz.

D'emperis es empaitz,
de regnes, de dugatz
Dieus, el mun, per forfaitz,
mas nos a tal forfaitz,
qu'a vos sals nos dugatz.

Lo coms s'es esforsatz
d'Astarac ab mals traitz
de pretz, don l'es atraitz
laus de grat non forsatz.

Coms de Rodes, bos plaiz
es per vos melhuiratz.