Lo quint vers d'en Guiraut Riquier, l'an MCCLXXIII

Humils, forfaitz, repres e penedens,
entristezitz, marritz de revenir
so qu'ay perdut de mon temps per falhir,
vos clam merce, Dona, Verges plazens,
maires de Crist filh del Tot-poderos,
que no gardetz cum suy forfaitz vas vos:
si·us plai, gardatz l'ops de m'arma marrida!

Qu'a penas truep nulh peccat de mi mens,
sal desesper e raubar ez aucir,
que dels autres mos cors no·s pot complir,
don suy avutz mantas vetz malsabens;
quar si espers ab bona fe no fos,
per trop peccatz greus vils e vergonhos,
fora m'arma del tot de Dieu partida.

Mas esper ai que·m siatz vos guirens
del greu perilh mortal que·m fa marrir,
de que no·m puesc per ren ses vos issir,
tans e tan greus trobi mos fallimens!
E donc pregatz vostre filh glorïos
que·m fassa far sos plazers e mos pros,
qu'aissi·m podetz tornar de mort a vida.

Quar Jhezus Cristz vos es obedïens
quant lo pregatz de peccadors guerir,
sol que·l vuellan, ben fazen, obezir;
per que per mi e per mos benvolens
e per totz selhs de be far deziros
vos prec, Dona, que·l preguetz qu'elh a nos
don per anar a lhuy veraya guida.

Que·l camis es de comensar cozens,
tant es estreitz ez aspres per fromir;
e quar del mon se fa tan greu partir,
es del camin greus sos comensamens
e l'acabars es pus greus per un dos,
tans hi trob'om de passes perillos,
que nulhs, ses guit, no va tro la guandida.

Per nos, Dona, Verges regina, fos
maires del filh de Dieu tot-poderos,
doncx acaptatz d'elh a nos esta guida.

Dieu prec del rey de Castella n'Anfos
que a son cors don honramens e pros
lonc temps, ab grat ez esperital vida.