Amors, merce: non mueira tan soven,
que ja·m podes vias del tot ausire;
que viure·m faitz e morir mesclamen
et enaissi doblatz me mon martire;
pero, mieg mortz, vos sui hom e servire
e·l servisis es mi miltans plus bos
que de null autr'aver rics gizardos.

Per qu'er peccatz, Amors, so sabes vos,
si m'auzizetz, pos vas vos no m'azire;
mas trop servirs ten dan mantas sazos,
que son amic en pert om, so aug dire:
qu'ie·us ai servit et encars non m'en vire,
e quar sabetz qu'al gizardon n'aten,
ai perdut vos e·l servir eissamen.

Mas vos, domna, que avetz mandamen,
forzatz Amor e vos cui tan desire,
non ges per me mas per dreg chausimen,
e quar plainhen vo·n pregon miei sospire;
que·l cor plora quan vezes los hueilhs rire,
mas per paor que no·us sembl'enoios
engan mi eis e trac mal en-perdos.

Non cujera·l vostre cors ergueilhos
poges el mieu tan lonc dezir assire;
mas per paor non fezes d'un dan dos
no vos ausi lo mieu maltrag devire;
ai! quar vostr'ueilh non vezon mon martire?
qu'adoncs n'agras merce, si doncs no men
lo dous esgartz que·m fai merce parven.

A vos volgra mostrar lo mal qu'ieu sen
et als autres celar e escondire;
qu'anc no·us puec dir mon cor celadamen;
donc, s'ieu no·m sai cubrir qui m'er cubrire?
ni qui m'er fis s'ieu eis me sui traire?
qui se non sap celar non es razos
que·l celon cill a cui non es nuls pros.

Domna, ·l fin cor qu'ie·us ai no·us sai tot dire,
mas so qu'ieu lais qu'ieu non dic per non-sen
restauratz vos en bon entendemen.

Mas N'Azimans ditz qu'ieu li sui traire,
el e·N Tostemps car eu m'en fatz gignos
quar tot mon cor non retrac ad amdos.