Tant fin'amors totas horas m'afila
ma voluntat, qu'ieu de lauzar m'afil
midons, qu'en re tan mais no s'asubtila
mos cars sabers, qu'ieu no·n ai ta subtil
que pogues dir l'una part de las mil
lauzors qu'om pot de lieys dir, que d'ans mil a
no nasqueth homs la pogues dir; non guil,
ni lunhs, per lieys lauzar, non pot dir guila.

Si quon virtut natural el safil a,
l'oriental, plus qu'en autre safil,
val mai midons qu'autra dompn'a gentil a–
mor ben amar a fin aman gentil;
e dic vos be qu'anc, depus qu'ieu senti·l
fin pretz de lieys e d'ins mon cor senti l'a–
mor qu'ieu li port, no fi cauza sotil
si quon denant, tant me desasotila.

Midons es tals que franc cor et humil a
verayamen a fin aman humil,
quan lo troba lial, non en re vila,
que no s'azaut ja de far cauza vil;
tant es d'onrat luec e de senhoril
que part totas dompnas pretz senhoril ha;
si tot no·s te qui la prega desvil,
ans selh que non la preya mot per vil ha.

Ges l'eranha tan prim no tey‹s›h ni fila
quon a mestiers qu'om lieys lauzan prim fil;
se tot l'obra s'es prima, ges estrila
non deu esser ni·s fa de luec estril,
per qu'a mestiers qu'om ta ferm la perfil
que sia fortz plus qu'autra sa perfila,
si que tostemps sia durable; si·l
la vol hom far per s'amor, ses tot si·lh a.

E qui bon'art e belh'e maestril ha
per far obra be fort e maestril,
que la vuelha far frevol e fragila,
mout tenc per fol son sen e per fragil.
Aitals suy ieu estatz, mas aqui vi·l,
que vi mon dan e que de midons vi la
fina valor... p... deus l'un capil
obrar d'obra que del joy d'amor pila.

Coms de Rodes, senher, quar ab gentil
pretz mantenetz valor, ‹e› de gentil a–
mor ben amatz ma Gensor, don porti·l
lauzor de vos e luenh e pres porti la.

Al bon senhor de Mercuer, qu'es el fil
de valen pretz, que no·s romp ni·s desfila,
chansos vai dir qu'ieu no truep qui s'apil
mielhs e fina valor, qu'elh s'i apila.